Erlendir aðilar og fjölmiðlar hafa verið duglegir upp á síðkastið að koma með neikvæðar fréttir af efnahagsástandinu hérlendis. Þar sem íslenskir blaðamenn eru því miður ekki allir með viðskipta- eða hagfræðimenntun (þeim er vonandi að fjölga) þá er e.t.v. eðlilegt að slíkar fréttir séu að einhverju leyti þýddar á okkar ástkæra ylhýra. Það gefur hins vegar oft ekki réttu myndina af ástandinu eins og hún er.

Ég ætla ekki að eyða þessu bloggi í því að lýsa því hvernig staðan er en fólk má vita að þetta er ekki jafnslæmt og það virkilega er. Það er e.t.v. gallinn við þetta, fólk trúir því sem fjölmiðlar segja því en leggur ekki upp í vinnuna að skoða málin sjálft. Þetta gildir að sjálfsögðu, og jafnvel einkum, um erlenda aðila og fjárfesta. Þannig, með nægilega miklu neikvæðu fréttaflæði, fara erlendir aðilar að trúa því virkilega sem er skrifað um í fjölmiðlum. Og þá fyrst verður staðan jafnslæm og lýst er - nokkuð sem kallað er spádómur sem rætist af sjálfu sér (e. self-fulfilling prophecy).

Mig hefur lengi langað til að vita eignarhald breskra fjölmiðla og því eyddi ég loksins 10-15 minútum í því að leita að því. Þar lærði ég að Telegraph samsteypan (Daily, Sunday og Weekly Telegraph) eru allar í eign Media Holdings. Það ágæta fyrirtæki á nokkur önnur blöð s.s. Spectator og Spectator Business. Tvíburabræður eiga Media Holdings og þeir eru mjög víðfemir á sviði smásöluverslana, fjölmiðla og eignamiðlana (property á ensku, vonandi rétt skilið hjá mér).

Það sem mér fannst forvitnilegt var að HSBC bankinn í Bretlandi, einn af stærstu bönkum Evrópu, aðstoðaði (lánaði) þá bræður við að koma sínu veldi á koppinn og á HSBC 5% hlut í fjárfestingafélagi þeirra bræðra, LW Investments. Var einhver að tala um að íslensku bankarnir væru þeir einu sem gerðu þetta? "Íslenska" módelið hvað?

Eitthvað segir mér að þessir ágætu bræður séu ekkert alltof ánægðir með viðskiptagengi Íslendinga. Tilvist Baugs í breskri smásölu og gott gengi IceSave Landsbankans í Bretlandi hefur sjálfsagt gert flest annað en aukið hagnað LW Investments. Skyldi eignarhald HSBC skipta einhverju máli? Að sjálfsögðu!

Eftir að ég lærði þetta mun ég alltaf setja spurningamerki, stærra en áður, við fréttir breskra fjölmiðla af íslensku efnahagslífi. Mæli með að þið gerið slíkt hið sama!

Gleðilega páska. 

Leiðrétting: Rétt er að taka það fram að LW Investments var sameinað Shop Direct sem saman mynduðu Littlewoods Shop Direct Home Shopping Ltd. sem á "stóran hlut í verslanamarkaði Bretlands" (e. operates a majority share of the United Kingdom's home shopping market). Heimildir mínar eru wikipedia og mediauk.

	Eitraður vogunarsjóður
Ábyrgðarmaður færslu Tilkynna um óviðeigandi tengingu við frétt

Mig langar nú til að vita meira en bara það sem kemur fram í þessari frétt s.s. hvernig þetta sé mælt. Er tekið tillit til ferðamanna sem hlutfallslega eru langmestir hérlendis miðað við fjölda íbúa (veldur aukningu á drukknum lítrum á hvern landsmann og er aukningin mest hjá þeim þjóðum þar sem ferðamenn eru hlutfallslega flestir)? Er tekið tillit til hvernig áfengi er drukkið þ.e. bjór, léttvín eða sterkt áfengi á borð við vodka, brennivín o.s.frv.? Líka skemmtileg áróðursgildi að benda á að neyslan hafi aukist mest hér. Varla ætti það að koma nokkrum manni á óvart. Fólksfjölgun aldrei verið meiri, sérstaklega á þeim aldri sem neytir helst áfengis, og svo er jú staðreynd að prósentuaukning er alltaf auðveldust fyrst þegar grunnurinn er lítill (absolút aukningin frá 2 í 3 er 1 alveg eins og frá 100 í 101... samt er aukningin hlutfallslega miklu meiri frá 2 í 3). Við vitum ekkert um það hvaða þjóð bætti mest í drykkjuna í lítrum talið, bara tekið fram að hlutfallslega hafi aukningin verið mest hjá Íslendingum... fáránlegt!

Fyrir þá sem ekki hafa reiknað það út þegar þá er þetta nú í sjálfu sér ekki svo mikið. Ef hver Íslendingur drekkur 7,1 lítra á ári (hvernig svo sem það er fundið út...) þá nær það ekki einu sinni einum bjór á dag (ca. 75% af einum bjór á dag, 5,0% að styrkleika). Til samanburðar má nefna að hjón sem skipta drekka tvær flöskur af rauðvíni saman á viku (seint skal það teljast glæpur...) slaga langleiðina í meðaláfengismagnið sem nefnt er í fréttinni. Einhvern tímann var sagt að rauðvínsglas á dag væri hollt fyrir hjartað. Það er ekki fjarri því magni sem Íslendingar drekka.

Endilega leyfum sölu LÉTTVÍNA og bjórs í matvöruverslunum. Íslendingar eru hægt og rólega að byrja að læra að njóta áfengis, vodkinn, sprittið og landinn eru á undanhaldi miðað við það sem áður var. Ég treysti okkur ágætlega til þess að velja sjálf hvað við drekkum, ríkið á ekki að hindra okkur í að velja það.

	Áfengisdrykkja jókst mest á Íslandi
Ábyrgðarmaður færslu Tilkynna um óviðeigandi tengingu við frétt